「受較潮濕的偏東氣流影響，早上有薄霧…」
眨下眼又來到「回南天」，連日相對濕度可高達95%，不單止衣物難乾、易有異味，玻璃或牆身甚至會出現水氣。
出動抽濕機固然有幫助，但長開一來電費貴，二來有些窿窿罅罅位又難抽走濕氣，咁可以點做好？
今次同你介紹四種低成本家居抽濕法，每款材料成本低至唔使$10，而且有加強防潮效用，實在是居家必備！
只需把粗鹽混入約40度熱水，可進行拖地或抹牆，即有效洗走濕氣，但如家居選用雲石地磚的話，則不宜使用。
相信大家都見過許多竹炭產品，$10左右價錢已經有一大包，只需將適量竹炭放入布袋，可製成防潮袋，經太陽曬後可重用。
梳打粉有清除髒污的功能，以濕牙刷沾取梳打粉後，可擦走洗手間等地方的頑強發霉位。此外，用布袋或空罐裝起小量梳打粉，放在衣櫃或抽屜，也有抽濕功效。
把報紙搓成一團或舖在櫃底，放在需要吸濕的地方亦可，但要留意需定期更換，避免報紙長期濕透出現惡臭味。
最後，除咗保持家居乾爽透風之外，亦要締造足夠舒適的空間，避免堆放雜物，才能讓家居企理和衛生。
